بقلم محسن محمد
نسمع كتير جملة "المدرسة ما بتعلّمش"،
بس الحقيقة غير كده خالص.
التعليم عمره ما فشل، اللي غابت هي التربية.
المدرس ممكن يشرح ويعمل اللي عليه،
بس لو الطالب جاي من بيت ما يعرفش يعني إيه احترام،
ولا عنده أدب ولا ضمير،
يبقى التعليم هيقع لوحده، ويتحول لمجرد كلام بيتحفظ ويتنسي.
المشكلة إننا ركزنا على الشهادة ونسينا الإنسان.
بقى هدفنا إن الولد "يجيب مجموع"، مش إنه "يبقى بني آدم".
نسينا إن التربية هي الأساس،
وإن التعليم من غيرها بيبقى زي شجرة من غير جذور، مهما سقيناها... مش هتطرح.
التربية مش كلام، التربية قدوة.
العيال بتتعلم من اللي بيشوفوه مش من اللي بيسمعوه.
لما يشوف أبوه بيغش، وأمه بتكذب، والمدرس بيهين،
والمجتمع بيكافئ اللي بيزوّر،
يبقى ليه نستغرب إن الأجيال الجديدة تايهة ومش عارفة الصح من الغلط
لما التربية تغيب، التعليم بيتعب.
المدرس يبقى موظف، والطالب يبقى رقم، والمدرسة تبقى مصنع شهادات.
لكن لما التربية ترجع،
بيرجع الضمير، ويرجع معاها الأمل في جيل فاهم إن العلم من غير أخلاق... خطر على صاحبه قبل الناس.
إرسال تعليق