بقلم/ امل صالح سليم
كانوا زمان بيحبوا بصدق ويصونوا العهد اللى كان
والقلب لو اختار حبيبه ما يبدلوش مهما كان
والنهارده الحب بقى لحظة وبيخلص قبل الأوان
قلب يشتاق ألف مرة وبكرة ينسى اللي كان
كان بيسهر عشان كلمة وكان بيحلم بالأمان
وشايف في عيون حبيبه عمره وأحلى مكان
وفجأة يبرد إحساسه ويختفي من غير عتاب
ويدور على قلب جديد ويفتح لحكاية باب
كل ما قلب يطمن نمل وننسى اللي كان
ونجري ندور على غيره ونبيع العهد والأمان
بقينا نعشق البداية ونخاف من طول الطريق
ونبيع عشرة سنين عشان وهم جديد وبريق
واللي كان بالأمس روحنا أصبح النهارده غريب
واللي قال مستحيل أنساك بقى أول واحد يغيب
يا خسارة قلب ائتمن قلب وما لاقاش فيه أمان
ويا خسارة حلم اتبنى على وعد ضاع فى هوان
الحب مش شوق ولا رسايل ولا كلام واهتمام
الحب إنك تفضل صادق لما يهدأ فيك الهيام
مش كل قلب بيدور على حب يبقى محتاج حبيب
يمكن محتاج يتعلم يحب قبل ما يجرح ويغيب
واللي كل يوم يبدل قلب ويفتكر نفسه كسبان
هتفضل كل الوجوه حواليه ويعيش وحيد ندمان
أصل اللي عمره ما صان قلب ولا عرف قيمة إنسان
مهما قابل قلوب كتير هيعانى من الفقدان
اصل الدنيا داين تدان
إرسال تعليق