كتب محسن محمد
لو مشينا في أي شارع، غالبًا حنقابل شخص بيطلب مساعدة. مرة طفل، مرة امرأة، مرة رجل كبير في السن. أوقات نحسّ إنهم فعلاً محتاجين، وأوقات نشك إن في شيء مش طبيعي.
التسوّل بقى جزء من المشهد اليومي في حياتنا، لكن هل فكرنا يومًا هو ليه موجود؟ وإزاي ممكن نواجهه؟
مش كل اللي بيتسوّل محتاج
في ناس فعلاً ظروفهم صعبة، مرض أو فقر أو عجز، ومضطرين يطلبوا المساعدة. لكن في ناس تانية بتستغل طيبة الناس، وبتخلي من التسوّل مهنة.
تلاقي واحد يمثل إنه مريض، أو واحدة شايلة طفل علشان تستعطف اللي حواليها، وأحيانًا بيكونوا شغالين ضمن شبكة كبيرة بتنظّم الموضوع ده!
ليه في ناس بتتسوّل؟
في أسباب كتير ورا الظاهرة دي، منها:
الفقر والبطالة.
غياب الدعم الكافي من الدولة للناس المحتاجة.
عدم وجود قوانين رادعة للمتسوّلين النصّابين.
قلة وعي الناس، اللي بتدي فلوس بدون تفكير.
نحل المشكلة
لو عايزين نواجه التسوّل بجد، لازم نشتغل على كذا حاجة:
مساعدة المحتاجين الحقيقيين عن طريق الجمعيات الخيرية أو الجهات الرسمية، بدل ما ندي فلوس لأي حد في الشارع.
توعية الناس إنهم ما يساهموش في انتشار التسوّل بإعطاء فلوس مباشرة.
تطبيق القانون على المتسوّلين اللي بيحتالوا على الناس.
توفير فرص عمل أو تدريب للناس اللي فعلاً محتاجين، علشان يقدروا يعيشوا بكرامة.
دور الدولة والمجتمع لازم يكون فيه تعاون علشان نوصل للي محتاجين بجد، ونساعدهم من غير ما يتحوّلوا لمتسوّلين.
التسول مش بس مشكلة في الشارع، دي مشكلة في المجتمع كله. محتاجة شغل، ووعي، ومجهود جماعي. لأن المساعدة الحقيقية مش في جنيه بنرميه لحد، لكنها في تغيير حقيقي يخلي الناس تستغنى عن مدّ الإيد.
إرسال تعليق