بقلم المستشار الاعلامى محمود رمضان
الدنيا مش دايمة لحد ، لا مال بيفضل ولا منصب بيستمر، واللي بيعيش بعدنا هو سيرة طيبة بنسيبها في قلوب الناس.
حب الخير للناس مش ضعف ، والتسامح مش قلة كرامة ، دي قمة الإنسانية ، لما قلبك يكون أبيض ، وتنوي الخير للكل، ربنا بيحبك ، والناس كمان بتحبك ، وده هو المكسب الحقيقي .
اللي بيشيل حقد وغل في قلبه ، بيتعب نفسه قبل ما يتعب غيره ، إنما اللي قلبه صافي ، بيعيش مرتاح مهما كانت الظروف حواليه ، والناس بتحب اللي دايما بيساعد ، ويقف جنبهم ، ويشاركهم الفرح قبل الحزن .
الدنيا مش مستاهلة زعل وخناق وخصام ، ولا حد هيفضل فيها ، افتكر دايما إنك لما بتسامح ، مش بتضعف ، بالعكس ، بتقوى ، وبتكبر في نظر ربنا ، وفي عيون الناس .
وأحب أقولها من قلبي :
أنا لا بحمل في قلبي حقد ولا غل ولا كراهية لحد ، ويعلم الله إني بحب الكل، وبتمنى الخير للجميع ، لإني مؤمن إن الحياة مش دايمة ، واللي باقي هو المحبة والنية الصافية والسيرة الحلوة .
ويمكن دلوقتي بكتب المقال ، وبعد لحظات أكون قابلت ربنا سبحانه وتعالى ، فبتمنى تكون كلماتي دي شاهدة عليا قدامه ، إني ما كنتش غير عبد بسيط بيحب الخير ، وبيتمنى السلام لكل القلوب .
في الآخر ، محدش هيفتكر إحنا كنا بنملك إيه ، الناس هتفتكر إحنا كنا بنحبهم قد إيه ، ووقفنا جنبهم إمتى ، وقلوبنا كانت صافية .
خلّي دايمًا قلبك أبيض ، وانوي الخير ، وسامح ، وساعد ، علشان تفضل دايمًا في قلوب الناس ، وسيرتك تفضل عايشة حتى بعد ما تمشي .
حب الخير والتسامح ، هما اللي بيخلوا الناس تفتكرك بخير، وهما اللي بيبقوا ، والباقي كله فاني .
إرسال تعليق