بقلم / عصام غطاس
في شجرة في شارعنا سألتني
هي شيرين فين
مبشوفهاش ليا شهرين
قولتلها خرجت تجيب حاجات من السوق .
قالتلي وراجعة امتى
اشوفها فين شمال ولا يمين
مهو الشارع اتجاهين ؟؟
سكت معرفتش ارد
علشان مكدبش وهضحك على مين
على نفسى ولا على الباقيين
ماهو انا عارف انك سافرتى ومش راجعة .
انتي جوايا عايشة
مع ولادى الغالين
انتى فى نفسى معايا
ومسبتنيش لحظة ،
بس نفسى اختلس من العمر نظرة .
الشجرة فهمت
ان فى حاجة غلط
لقيتها بتبكى
قلتلها بتبكى على مين ؟
قالتلي حاسة انى مش هشوفها تاني
لاني عايشة معاها
ووياها كبرنا
ومتربيين عمرها من عمرى
وعمرها ما غابت عنى
لو هيا ماتت يبقى انا اروح فين ؟
إرسال تعليق