كتبت ✍ ناديه الشرقاوى
خلف تلك القضبان الباردة، لا يوجد سجن فقط.. هناك مقبرة.
مقبرة لا يُدفن فيها الأموات، بل يُدفن فيها الأحياء
في لحظه غضب في يوم وليله بتلاقي نفسك في دايره تايه فيه مش عارف انت عملت اي كل ده في دقيقه في لحظة شيطان بتلاقي نفسك في مقبره الأحياء أصعب من مقبره الاخره
*الحياة خلف الحديد*
هناك.. النهار يشبه الليل. الشمس تدخل من فتحة صغيرة، كأنها تستأذن. الهواء له رائحة حديد وعرق وانتظار.
الجدران تسمع أكثر مما تتكلم. كل حائط حافظ ألف حكاية، وألف دمعة، وألف "يا ريتني".
أصعب ما في السجن ليس السور العالي، بل السور اللي بيتبني جواك.
سور بينك وبين أهلك، بينك وبين ولادك، بينك وبين نفسك القديمة.
*الكل منسي هناك*
الأم تبكي كل زيارة وتقول "هانت". والزوجة بتعد الأيام على الحائط. والابن الصغير بيكبر وهو فاكر إن أبوه مسافر.
والسجين؟ السجين يموت كل يوم ألف مرة. يموت لما يسمع ضحكة عياله في التليفون ومش قادر يحضنهم. يموت لما يشوف زميله خرج وهو لسه. يموت لما يحس إنه بقى مجرد رقم.
*مقبرة بلا شواهد*
في المقابر العادية، الناس تزور وتقرأ الفاتحة. أما في مقبرة الأحياء، الناس بتنسى.
الصحاب بتنسى، والشارع بينسى، وحتى بعض الأهل بينسوا. يبقى السجين وحيدًا مع ذنبه، أو مع ظلمه، الله أعلم.
هناك ناس دخلت مظلومة، وناس دخلت غلطانة وتابت، وناس لسه بتدفع تمن لحظة غضب. كلهم في الآخر.. أحياء مدفونين.
*الحرية مش باب يتفتح*
الحرية الحقيقية لما يخرج.. هيلاقي العالم اتغير، والناس اتغيرت، وهو لسه واقف هناك عند نفس اللحظة اللي اتقفل عليه فيها الباب.
عشان كده بنقول: السجن مش تأديب بس.. السجن لازم يكون إصلاح. لازم اللي يخرج من المقبرة دي، يخرج بني آدم جديد، مش بني آدم ميت ماشي على رجليه.
ساعه شيطان ولحظه غضب بتلاقي نفسك في خلف القضبان
إرسال تعليق