بقلم داليا غازى
في رحلة الحياة هتقابل وتشوف وتعرف ناس كتير ناس مختلفة في الطباع والثقفات حتي في المشاعر والاحاسيس وكل واحد هيشوفك بطريقة مختلفة
فيه ناس انت بالنسبالهم "هدف" .. مجرد ما يوصلولة بتفقد قيمتك في عينيهم .للأسف وبعد رحلة الوصول ليك بيحسوا انهم نالوا هدفهم فاعلطول بينهوا الرحلة ويبدءوا رحلة جديدة ويهبطوا علي هدف جديد
وفيه ناس انت بالنسبالهم "مصلحة" اول ما ياخدوها، بتبقى مالكش لازمة ليهم وعلي رائ المثل خلصت حاجتي من جارتي خلاص مبقاش ليها عوزة
وفيه ناس انت بالنسبالهم "انبهار" اول مايقربوا منك ومع الوقت ، بتتحول لشخص عادي وينبهروا بغيرك ويسيبوك .عشان كده فيه ناس لازم تفضل مخليهم منبهرين ومتشلش الحاجز اللي بينك وبينهم بس،للأسف مش بنعرف غير بعد فوات الأوان
وفيه ناس انت بالنسبالهم "المتاح" مافيش غيرك دلوقتي يلجأولك ، لأنك للاسف عودتهم انك دايما موجود في اي وقت هيلاقوك وطبعا اول مايلاقوا بديل ليك بيستغنوا عنك .عشان كده اوعي تكون المتاح في اي وقت لأي حد
وفيه ناس انت بالنسبالهم "قيمة و حب" انسان ..بتفضل دايما في عينيهم مهما طال الزمن واختلفت المسافات والاماكن بتفضل انت نفس الشخص اللي مش ممكن يستغنوا عنه الناس دي اللي بتشوفك بعيون وروح محبة بيشفوك علي طبيعتك وبيقبلوك بكل مميزاتك وعيوبك بيقبلوك كده زي ما انت بسلاطتاك وبابا غنوجانك بيتقبلوك بحلوك ومرك دول بقي امسك فيهم بايدك وسنانك وحافظ عليهم وكمل معاهم مشوارك
وانت ماشي في رحلة حياتك هتلاقي كل انواع الناس دي..
المهم وانت في رحلة حياتك ما تقفش قدام تصنيف انواع الناس اللي بتقرب منك وتلوم نفسك وتزعل .. اعتبرها تجارب و استمتع واتعلم المهم انك تكون امين مع نفسك في صداقتك ومحبتك لكل انواع الناس اللي بتقابلهم
خليك امين في كل علاقاتك وماتزعلش ولا تلوم نفسك على اي موقف إيجابي أنت عملتة مع حد .
أفرح وأفتخر بنفسك وبصدقها وقوتها ، وسيب كل واحد حر في الطريقة اللي يقرر يشوفك بيها ويقرب بيها منك
كل شحص يري الناس بعين طبعه
المهم في النهاية توصل بنفسك لبر الأمان وتتعلم تفرق بين الناس واختار وانت صاحب قرار وسلم لنا بقي علي التروماي
إرسال تعليق