بقلم محسن محمد
عيد الحب مش بس للعشاق
الناس فاكرة إن عيد الحب معمول للعشاق وبس،
بس الحقيقة إن الحب أكبر بكتير من كده.
الحب مش وردة حمراء ولا هدية في علبة شيك،
الحب كلمة حلوة في وقتها، حضن بيريّح،
موقف صادق بيطمن، ونية طيبة بتطلع من القلب وتوصل للي حواليك من غير ما تقول.
في اليوم ده، افتكروا إن الحب مش بس بين راجل وست،
في حب الأم لعيالها، وحب الصحاب اللي بيشيلوا بعض،
وحب الواحد لبلده، وحبك لربنا وانت بتقوله "الحمد لله" من قلبك.
إحنا بقينا عايشين في زمن الناس بتتكسف تقول "بحبك"،
بس بتقول "مش فاضي" كل يوم!
والدنيا ناقصة حب، ناقصة دفء، ناقصة ناس بتخاف على بعض بجد.
فـ لو ناوي تحتفل بعيد الحب،
احتفل بالحب كله... حب الناس، حب نفسك، حب الحياة.
ابعت كلمة حلوة، سامح حد، خُد خطوة ناحية الخير.
هو ده العيد الحقيقي، مش البالون والقلب الأحمر.
كل سنة وكل قلب فيكم عامر بالحب والرضا والحنية.
إرسال تعليق