بقلم ايمان عبده
كبرت وأنا مستنى حضن يطمنى
لقيت القسوة هى اللى مستنيانى
كنت فاكر أهلى أول ناس تحمينى
لقيتهم أول ناس وجعوا كيانى
أنا مش طالب غير كلمة حنينة
ولا طالب دنيا ولا مال كتير
كنت محتاج أحس إنى ليا قيمة
مش كل ما أتكلم ألاقي مصيرى
يا أهل بيتى ليه القسوة دى
ليه الحنية عندكم بقت غريبة
أنا منكم وانتوا أهلى وسندى
ليه خليتوا روحى تعيش وحيدة
كنت كل ما أتعب أرجع ليكم
وأقول أكيد حضنكم هيشفينى
لكن كل مرة ألاقي جرح جديد
وأرجع وأنا بسأل مين يواسينى
أنا مش عاق ولا قلبى حجر
بس الجرح علمنى أسكت وأبعد
فى حاجات بتكسر الإنسان مرة
وفى قسوة الأهل بتكسره للأبد
نفسى يوم أسمع صوت يقول لى
تعالى يا ابنى إحنا محتاجينك
من غير لوم ولا عتاب يوجعنى
من غير ما أحس إنى غريب بينكم
أنا لسه بحبكم رغم اللى كان
ولسه جوايا طفل نفسه فى أمان
بس لو يوم شفتونى بعيد
اعرفوا إن القسوة علمتنى النسيان
إرسال تعليق